مسافة حلم بين الكحل وجفونك جمالك من بحر فتنة بلا مرفا

فجأة وسال الغيم عشق وتجلّى أبخل سحابة طاح منها برَدها

أنت الطريق اللي بعمري قطعته أمشيه بأحلامي ولو ما تبيّنت

بهت وجه الزعل ما للزعل ملّة شقى به قلبي اللي دوم يشقى بك

يا ليت شعري ولو باحت وراي السدود هل باقي من الشعر ما يستحق ابتديه؟!

العز فرصة عمر، والعمر فوّات وانت الغني عن الحظوظ الفقيرة

الشعر، صوت السهر، والحزن قلب الليال ان دقّ قلب الليال يصيح صوت السهر

هذا القلم، آلة حزن تعزف حروف وهذا الحبر، خمر الورق والمعاني

طفلة وبدري توّها تفهم العلم على الثمر في غصنها ما مضى عام

وتحبّني لكنّها تحبني في غطرسة

نامت عيونك وحنّا سهارى المسا، وانا، وعذب القوافي

صباح الخير وبسمة تسرق من الصبح جنحان الوله وتطير

رغم جور المفارق ما تعلّمت صار مشوار حلمي عشق وهيام

سيّد الخافق ومسهر طرف عيني عرشك الصدر وضلوع الصدر تاجك

سولف مع القمرى من الروح للروح ملّت سواليفك ظلام الحنايا

ما نجهل الدنيا ولا نعلم الغيب بس الزمان اذا تمايل، تمايل

أقول وكفوف الفكر حاتميّة لا بارك الله في ردي الأشاوير

ما شبّت الفزعة فتيل القناديل وشاخت على درب الرجا ظلمة الياس

دلوعة الما والسحايب واهلها ليل أمس جات وقصّرت عمر ليل أمس

مجنونة الحسن يرحم حال مجنونها ما عاد باقي على طارف لسانه عتب