الجمايل
ما نجهل الدنيا ولا نعلم الغيب
بس الزمان اذا تمايل، تمايل
تصيب بعض احيان واحياناً تخيب
وانت اعتبرها مثل كبوة الأصايل
نمشي على درب الكرم والمواجيب
ولا شكينا من سموم القوايل
ولو البشر ماهي تحب الأصاعيب
ما كان عاشت في الجزيرة قبايل
الطيب ما يعني تجنّابك العيب
العيب كيف تطول روس الطوايل
يا سيّدي من قبل فتح المكاتيب
اقرى على الدنيا عسيف المثايل
أقسى طعون الضيف طعنة معازيب
لا من غدت بين الردى والتحايل
يا سيّدي والحزن شيخ المحاديب
تحت أمره تقوم وتطيح الحمايل
ترى الكرم يستر كبار العذاريب
وترى البخل يقطع يدين الفضايل
من شفت ناب الذيب في جيفة الذيب
آمنت بأن أهل المروّة قلايل
لا صرت ما تضمن قلوب الأصاحيب
جنّب قبل تلفي عليك الفشايل
أحدٍ إذا مدّيت له طيبك يغيب
ما تملي عيونه كبار الفعايل
وأحدٍ يموت إن كان سوّيت به طيب
يخاف ما يقدر يرد الجمايل
