غيوض الصبايا
سولف مع القمرى من الروح للروح
ملّت سواليفك ظلام الحنايا
جر الغنا لو صوت الأحلام مبحوح
عساك تروي به عروق الضمايا
قد لك على هالصمت حول أربع جروح
وللحين ما جاتك غيوض الصبايا
ومعذورة ان غابت ولو كنت مجروح
إلى متى وهي لنزفك مرايا
شفها رمت من كفّها خاتم النوح
وردّت على كفّ الهموم الهدايا
وشف جيدها تزهى به قلادة طموح
وشف ثغرها يزهى بروق الثنايا
متى يكحّل طرفها مكحل البوح
وتصبح نواظرها حديث البرايا
رح يمّها مالك مع الصبر مصلوح
من قبل ما تذبل ورود الحكايا
واسهر معاها بين شرهات ومزوح
حتى يطيح آخر غصون الخفايا
وشيّد لها من طينة أحلامك صروح
وارخص لها من نبض قلبك عطايا
هذي بروق المجد في دربك تلوح
كم لك تسولف عن كبار النوايا
اليوم شف باب التباشير مفتوح
ادخل مدام ان الهقاوي ملايا
معشوقتك في عيونها الشوق مفضوح
جاتك وسوّت في الطواري سوايا
شف كيف ناظرها عقب مكحل البوح
اللحين أقول إنها غيوض الصبايا
