مسافة حلم

مسافة حلم بين الكحل وجفونك
جمالك من بحر فتنة بلا مرفا
وانا البحّار، وأشرعتي يحبّونك
أبيك الموطن ومحتاجك المنفى
خذت فرحة ظنوني قسوة ظنونك
وصمتي ملّ من كثر الوله واقفى
مع إنّي ما قدرت أتحمّل طعونك
زعلت شوي، لمّا شفتها تشفى
وربي ما عرفت أرتاح من دونك
غيابك برد وضلوعي تبي تدفا
لو أهملني زمانك باقي أصونك
معك غنّا الجفا وانا عجزت أجفا
نوى قلبي وصرت مجنونك
وكنت العاشق المستنزف الأوفى
أحب أشوف صوتك، وأسمع عيونك
وأشمّ رضاك، وألمس ضحكتك، وأغفى!