وجه الزعل

بهت وجه الزعل ما للزعل ملّة
شقى به قلبي اللي دوم يشقى بك
يا ضيعة من قصد وصلك ولا دلّة
مع حلم الرضا واقف على بابك
يسولف ضحكة أهدابك على ظلّه
ويضحك ظلّه وما تضحك أهدابك
معك صمت الغضب مدري متى تملّه؟
وتغمر مسمعي في عطف ترحابك
ومن غيرك أجلّ رضاه وأجلّه
ومن غيري سماوي يعشق ترابك
رغم كثر الحكي سولفت من قلّه
ولا ارضاك الحكي ولا الوله جابك
واذا باقي بقلبك شي من غلّه
معاك الحق مهما كانت أسبابك
تبي تزعل علي وتدوّر الزلّة
أنا راضي عليك ولازم أرضى بك
عليك عتاب، غير عتاب خلق الله
أحب أزعلك، لجل أسمع عتابك