متغطرسة
متغطرسة
طبع وشعور
وبكل اساليب الغرور
متمرسة
وتحبّني لكنّها تحبني في غطرسة
متغطرسة!
متمرّدة
راي ومزاج
وعلى جميع أوامري دايم لها ألف احتجاج
وأي شي أبيه
تزعل عليه
حتى الثياب أي لبس أحبه عندها ما تلبسه
متغطرسة!
متكبّرة
فتنة وغي
ولا تشوف الناس شي
حتى الهوا دام البشر تتنفسه
لو بيدها ما كان مع باقي البشر تتنفسه!
متغطرسة
الشاعر اللي شيّب الوقت راسه
ما زال رغم اللي جرى فيه واقف
يحسّ بالغربة رغم كثْر ناسه
ويزداد شوقه بازدياد المعارف
فإن قلت لك: لا يختلي فيه ياسه
ردّي وانا عن كل شي صار آسف
اخذيني من الفلسفة والسياسة
إلى الهدوء الممتلي بالعواطف
مبطي وانا ما شفت وجه الوناسه
هايم على وجهي بوسط العواصف
وتغطرسي في هالجمال بشراسة
هذا الدليل إنك فريدة وصايف
فيك الرجال يسولفون بحماسة
وفيك النسا ما يهضمون السوالف!
